रमेश खरेलबारे निर्वाचन आयोगले बैठक डाक्यो

१३ जेठ, काठमाडौं । काठमाडौं प्रहरी प्रमुख रमेश खरेलको सरुवाबारे छलफल गर्न निर्वाचन आयोगले आचारसंहिता समितिको बैठक डाकेको छ ।

खरेलको सरुवाका लागि सहमति माग्दै गृहमन्त्रालयले आयोगमा पत्र पठाएको छ । ‘गृहको पत्र प्राप्त भएको छ’ एक आयुक्तले अनलाइनखबरसँग भने-’बुधबार आचारसंहिता समितिको बैठक बोलाइएको छ, त्यसमा छलफलपछि के निर्णय हुन्छ भनौंला ।’

असार ८ गते हुने उपनिर्वाचनका लागि आयोगले आचारसंहिता लागू गरेको छ । उक्त अवधिमा सरकारले अत्यवश्यक सरुवा, वढुवामा निर्वाचन आयोगको सहमति लिनुपर्ने हुन्छ ।

डीआईजी बढुवामा आर्थिक चलखेल भएको अभिव्यक्ति दिएपछि खरेलमाथि छानविन सुरु भएको छ । डीआईजी विज्ञानराज शर्माको संयोजकत्वमा तीन सदस्यीय छानविन समिति बनाइएको छ । छानविन सुरु भएलगत्तै खरेललाई काठमाडौं प्रहरी प्रमुखबाट हटाउने निर्णय भइसकेको छ ।

खरेलले शनिबार एक सार्वजनिक कार्यक्रममा एआईजीको बढुवाका लागि डीआईजीहरु ब्रिफकेस बोकेर नेता र शक्तिकेन्द्रको ढोकामा धाइरहेका भन्दै भ्रष्टलाई बढुवा नगर्न आग्रह गरेका थिए ।